أشتري جديد ولا استيراد؟
أشتري جديد ولا استيراد؟ طبعاً السؤال ده اتسأل كتير جداً ورغم أن اتعمل مقارنات كتير بين الاجهزة الاستيراد والجديدة التجميع ومكانتش عادلة نهائياً بس هنتكلم عن الموضوع ده بكل حيادية ونحدد كل المزايا والعيوب بين الاتنين علشان تقدر تحدد في الاخر هتشتري ايه.
طبعاً من بعد تعويم الجنية وان الدولار في ايامنا دي اكتر من 15 جنية فأصبح أن الشخص العادي صعب جداً يشتري جهاز تجميع بمواصفات مُرضية لان الاسعار بقيت حرفياً لأبناء تجار العُملة فطبعاً لولا الاسعار أكيد كنا كلنا هنشتري جديد وأحنا مغمضين وده شئ الكل متفق عليه ومفيهوش أي نقاش نهائياً ولكن رغم أن ميزانيتنا هي الي بتحدد فبيكون صعب جداً اننا نشتري جهاز سواء كان لشغل الجيرافيك والرندر أو حتي للجيمز ومش بيكون قدامنا غير اننا نشوف حد موثوق نشتري منه تجميعة مستعملة أو اننا نتجه للأجهزة الي كما تسمي “الأجهزة الأستيراد” وقبل كل شئ لازم نفهم يعنى ايه أجهزة أستيراد وزي ما قولنا هنتكلم عن الموضوع كله بالتفصيل علشان الصورة تكون واضحة جداً قدامك ونبدأ بأول شئ.
يعنى ايه جهاز كمبيوتر استيراد؟
كتير مننا لما بيجي في باله أجهزة استيراد بيفكر أن الاجهزة دي بتكون ناس بيستخدموها في بيوتهم في الدول الاجنبية وبعدين يبيعوها و تجيلنا احنا مستعملة تحت مُسمي استيراد ولكن الفكرة دي مش صح لأن الاجهزة دى بتكون في شركات كبيرة جداً وبيكون في مئات من الاجهزة شغالة ومجرد ما الجهاز يحصل فيه أي عطل ولو بسيط جداً وتافه فبيتم استبداله بواحد تاني من الشركة الرسمية المصنعه نفسها وبعدين بيحللوا العطل ده وزي ماقولنا أنه بيكون سهل أو بسيط جداً لدرجة انه ممكن يكون الجهاز عمل لاج بسيط بس عمليات الشغل بتاعتهم مش بينفع فيها حدوث أي مشكلة من النوع ده فمش بيبقبلوا بيه وبعد كده بيتم بيع الاجهزة دي للدول التانية تحت مسمي أجهزة أستيراد.
طيب يعنى هل الاجهزة دي متهالكه وغير صالحة للاستخدام؟ الكلام ده مش صحيح وطبعاً بتعتمد علي الشخص أو التاجر الي بيدخل الشغل لانه بيكون عارف حالته وبالتالي أكيد بيكون في تجار بيقبلوا بشغل متهالك لانه بيكون واقع عليهم بتكلفه بسيطة جداً وبيكون المكسب من وراه كتير وطبعاً مش كل التجار كده لان في أي مجال في الدنيا فيه الكويس والي بيتقي الله في شغله وفي الي بيكون هدفه المكسب وبس من غير ما يفكر في اي حاجة تانية الا من رحم ربي فبالتالي مش كل الاجهزة الاستيراد متهالكة وغير صالحة للاستخدام زي ما كتير فاكر وهنشرح بالظبط أزاي تشتري جهاز استيراد بدون ما حد يستغلك أو يضحك عليك.
مميزات أجهزة الكمبيوتر الاستيراد
- سعرها كويس جداً لأصحاب الميزانيات المحدودة
- بتقدملك أداء مُرضي جداً وده بيعتمد علي حالة الجهاز
- متوفرة في كل مكان يعنى مش هتحتاج أنك تشتريها أونلاين
- رغم أنها بتكون أجهزة أصداراتها قديمة بس علشان نكون صارحين مفيش أفضل من التجميعة الشاملة الي الشركة الرسمية نفسها بتكون عملاها
عيوب أجهزة الكمبيوتر الاستيراد
- للاسف جزء كبير من الاجهزة بيكون صعب أنك تعمل ليه تحديث في المستقبل بسبب حجم الجهاز الي أوقات مش بيسمحلك تركب كارت الشاشة الي عاوزه.
- بالنسبة للاجهزة الموجودة في السوق أصداراتها قديمة وخاصتاً أن حالياً في الجيل الـ 11 من شركة Intel.
- معظم الاجهزة أنظمة التهوية فيها بتكون ضعيفة فبالتالي بيكون في تجمع أكبر للاتربة والي اوقات بيسبب خلل في الجهاز ومنها مشكلة صفارة الرامات المشهورة.
- علي حسب أستخدامك وطريقة استخدامك للجهاز و وضع الحرارة الي بيكون فيها ونظام التهوية الي اتكلمنا عنه كل ده بيحدد وبيقلل من عمرها الافتراضي إلا إذا كنت مهتم بالجهاز كويس.
بما أني شخصياً عندي جهاز استيراد لمدة متقلش عن 8 سنين استخدام فدي وجهة نظري والعيوب والمميزات الي شوفتها شخصياً بكل حيادية وبرضه زي ما نبهنا أن الميزانية هي الي بتحكم بس بعيداً عن كده الجهاز مأدي معايا الغرض جداً ومحصلش معايا اي مشكلة طول الفترة دي, عموماً بعد ما اتكلمنا عن المميزات والعيوب في الاجهزة الاستيراد نتكلم عن الاجهزة الجديدة أو التجميع.
أجهزة الكمبيوتر الجديدة / التجميع
طبعاً مين فينا مش بيحلم بجهاز زي الي في الصورة كده بس لو أنت شغال في الجيرافيك أو جيمر محترف و عملت تجميعة أحلامك علي الورق وروحت سألت علي سعر كل قطعة هتتصدم صدمة عمرك لأن الاسعار حالياً غالية جداً وبالذات كروت الشاشة بسبب موضوع التعدين الي كتير عارف انه كان السبب في استهلاك كل الكروت الموجودة في المخازن و قلت عدد الكروت للمستخدمين العاديين لذلك الي بيقدر يشتري كارت زي RTX 3080 في الايام دي حرفياً بيكون زي مايكون معاه أثار من كتر ماهي نادرة وغير كده التجار الي بيكون عندهم بيكونوا حاطيين أسعار غالية جداً لان في بعض التجار الا من رحم ربي بيستغلوا أن مفيش كروت بيحطوا مكاسب مش طبيعية في الكارت الواحد ده غير أن بعض التجار للاسف بيستخدموا اسلوب سئ جداً في البيع أنه مش بيبيع أي قطعة هاردوير لوحدها زي كارت الشاشة مثلا لانه بيخيرك أنه علشان تاخد الكارت لازم تاخد التجميعة كاملة من عنده وده فيه أجبار واستغلال من بعض التجار لانهم عاوزين يبيعوا كل البضاعه إلي عندهم وكتير جداً من الناس علي مواقع السوشيال ميديا أشتكوا من الموضوع ده.
طبعاً مش هننكر أن الاجهزة الجديدة بتكون كفائتها عالية جداً وحتي كشكل و Setup بيكون خرافي وحقيقي هتبقي بتحب أنك تشغل الجهاز حتي لو مش هتشتغل أو تلعب عليه بس للاسف كل يوم بتسمع أسعار جديدة ده غير أن كل مكان ليه سعر مختلف عن التاني وطبعاً زي ما قولنا مش هينفع تشتري كل قطعه من المكان الارخص فلذلك أحنا كعرب وكمصريين تحديداً بيكون أنك تجمع جهاز بقي زي الجواز في الايام ده لذلك تقدر تشتري جهاز استيراد تأدي بيه الغرض مؤقتاً وبعدين تجمع علشان تشتري الجهاز جديد وكل القطع مرة واحدة.
هنتكلم دلوقت عن المميزات والعيوب في الاجهزة التجميع أو الجديدة.
مميزات الأجهزة التجميع / الجديدة
- أداء ثابت وبتديلك أفضل تجربة و أفضل أداء ممكن تتخيله وده طبعاً بيعتمد علي أختيارك لقطع الهاردوير كويس بدون تسرع علشان ميحصلش عندك عنق الزجاجة.
- قابلة للتحديث والتجديد بكل سهولة وده بيعتمد علي نوع قطعة الهاردوير الي هتحدثها.
- شكل جميل جداً وأنظمة تهوية داخلية وخارجية للحفاظ علي الجهاز من الحرارة والاتربة والي بكده هيديلك أفضل تجربة.
- مشاكلها بسيطة جداً ومش معقدة وأن معظم الاجهزة الحديثة بتبينلك في المازر بورد كود في مربع لو كان في أي خطأ في الجهاز وانت مش عارفه وبتبحث عنه وبتوصل للمشكلة بكل سهولة وسرعة وتقدر تحلها.
عيوب الأجهزة التجميع / الجديدة
العيوب طبعاً مش كتيرة بس هي فكرة أن سعرها غالي جداً جداً وان بعض قطع الهاردوير صعب تلاقيها واستغلال التجار الا من رحم ربي وغير كده معتقدش أن في أي عيوب تانية.
إزاي تشتري جهاز جديد من غير ماحد يستغلك
إذا كنت حابب تشتري جهاز جديد فأحنا في تريند عاملين ليك مقالات لكل قطعة هاردوير وأزاي تختارها كويس تقدر تشوف المقالات دي كلها و بأذن الله بعدها هتكون فاهم كل شئ وتقدر تحدد وتشتري صح من غير ما حد يستغلك أو يضحك عليك ودي المقالات.
من بعد ما تشوف المقالة المخصصة لكل قطعة هتكون الدنيا كلها واضحة قدامك ومش هتحتاج لحد أنه يوجهك أو ينصحك تشتري أيه وانت بنفسك هتحدد هتشتري أيه علي حسب أستخدامك وبكده نكون خلصنا الاجهزة التجميع ونخش علي الاجهزة الاستيراد وازاي تشتريها.
أزاي تشتري جهاز استيراد مضمون
كلامنا الي جاي مش هيكون مقتصر بس علي الكمبيوتر بالتحديد لاننا هنتكلم كمان عن اللابات لان عارف ان ناس كتير كانوا بيسألوا اشترى لاب توب جديد ولا استيراد؟ فالكلام ده موجه ليهم كمان.
طبعاً زي ما حددنا أن الي هيشتري استيراد هيكون لاصحاب الميزانيات المحدودة او الي هيشتري الجهاز كام سنة وبعدين يشتري جديد و هنقولك أزاي تشتري الجهاز, مبدأياً علشان تشتري جهاز لابتوب أو PC لازم تتأكد من الحاجات دي كويس جداً.
- أختار تاجر يكون كويس ويكون براعي ربنا في شغله.
- حالة الاجهزة عنده زيها زي الجديدة الي اتكلمنا عنها بتكون خارجة من الشركات كأنها جديدة بالظبط.
- تتأكد أن ليك مدة ضمان متقلش عن اسبوعين مثلا وعموماً لو في أي مشكلة هتظهر من أول يومين مع استخدامك.
- بالنسبة لو لابتوب من قبل ما تمشي من المكان لازم تعمل تيست شامل للجهاز وبالذات الشاشة لو فيها اي خدوش أو أي حاجة مش طبيعية واتاكد ان كل المداخل شغالة وكمان الـ DVD لو كان موجود واتاكد من الصوت انه شغال كويس وان حروف الكيبورد كلها شغالة تمام وبكده هيكون معاك الضمان ضد عيوب الصناعة بس لو ظهرت معاك بعد كده
في شركة Trend Pc بيكون في ضمان وبتقدر تختبر المنتج من قبل ما تمشي لو كان لابتوب بالذات وكمان بنختبر المنتج كويس جداً وبيتعمل عليه أختبارات كتير ولو كان كارت شاشة كمان بيتم عمل اختبار عليه علشان لو كان متعدن عليه قبل كده وغير كده حالة الاجهزة كلها محترمة جداً لاننا الاهم عندنا من المكسب هو رضاء العميل وأنه ميكونش أخر تعامل بينه وبينا.
طبعاً قبل ما تروح تشتري بعد ما اتأكدت من كل النقاط المهمة الي اتكلمنا عنها المهم انك تحدد استخدامك علشان تعرف انت هتشتري ايه بالظبط يعنى لو كان شغلك جيرافيك وريندر بس وهتشتري الجهاز علشان الشغل فتقدر تشتري جهاز workstation ويكون بمعالج xeon ورامات متقلش عن 16 و كارت شاشة nvidia quadro ميقلش عن 2 او 4 جيجا وطبعاً هتحدد نوع الكارت الي عاوزه ايه بالظبط من قبل ما تشتري علي حسب ضغط شغلك و حقيقي جهاز زي ده هيكون غالي جداً بس لو عملت مقارنة بينه وبين جهاز تجميع جيمينج في الريندر هو الي هيكسب لان كتير جداً من الناس بتقارن الاجهزة الاستيراد بالجديدة التجميع مقارنة غير عادلة خالص لذلك الجهاز ده هيأدي معاك الغرض وزيادة لان الشركة نفسها مصنعاه للشغل ده وطبعاً زي ما قولنا مفيش أفضل من الاجهزة المجمعه من الشركة نفسها وطبعاً لو جبنا جهاز gaming مخصص من شركة Hp هيكون بسعر خيالي بس حقيقي أداءه هيكون أعلي بتكتير من معظم الاجهزة المجمعه الموجودة حالياً لان دي ناس مطورين وده شغلهم وهما الي بيختاروا القطع كويس جداً وانها تكون متوافقه مع بعض.
أما إذا كنت هتشتري جهاز علشان تستخدمه في الجيمز فلازم تحدد الالعاب محتاجة امكانيات ايه ومتخليش حد يستغلط ويقولك الجهاز ده بيشغل بيس او فيفا وان كارت الشاشة UpTo 10 Giga مثلا وتقدر تشوف مقالتنا علشان تفهم أكتر عن الموضوع ده “هل سلسلة A في معالجات AMD جيدة؟“.
بعد ما حددت الالعاب الي عاوزه لازم تعرف ان الجهاز ده عمره ما هيديلك تجربة زي الاجهزة الجديدة بس هو هيأدي معاك الغرض وهيديلك أداء مُرضي علي حسب أختيارك صح للجهاز وكارت الشاشة لذلك إذا كنت هتلعب بيس 21 وألعاب أونلاين زي بابجي او Valorant و فيفا 21 وكتير من الالعاب المشهورة فتقدر تشتري جهاز يكون I5 أو I7 جيل رابع علي حسب ميزانيتك مع كارت شاشة Rx 570 4gb أو Gtx 1050ti 4gb أو أي كارت ميقلش عن 4 جيجا وبما انه استيراد فلازم تاخد بالك انك لازم تجربه حتي لو كان التاجر مجربه وتقدر تشوف مقالتنا المميزة “طريقة فحص وأختبار كارت الشاشة“علشان تفهم أكتر لان زي ما قولنا معظم الكروت الي في السوق كانت بتسخدم في التعدين وبعد ما تتأكد كده مع الضمان بيبقي امورك تمام وتقدر تشتري وانت مطمن وبكده هيكون معاك أفضل كمبيوتر استيراد.
والكلام ينطبق علي اللابتوب بتحدد أستخدامك هيكون أيه وبناء علي كده بتحدد الامكانيات الي محتاجها علشان تقدر تأدي المهام المطلوبة بدون ما يحصل أي مشاكل في اللابتوب او ضغط عليه وتقدر تشوف المقالة دي مخصصة للابتوب مهمة جداً ليك “أهم النصائح للحفاظ علي اللابتوب لأطول فترة ممكنة“
لو كان استخدامك جيرافيك وريندر فأتأكد ان اللابتوب فيه كارت شاشة nvidia quadro واتاكد كمان ان المعالج قوي ويفضل أن يكون الهارد نوعه SSD علشان تأخد أفضل تجربة وسرعة أكبر في انجاز شغلك ولكن لو كان استخدامك العاب فركز في الامكانيات والالعاب الي عاوز تشغلها و مع النصائح الي في المقالة الي فاتت هتكون كل حاجة معاك تمام بس متنساش تعمل اختبار للابتوب كامل أحتياط.
وبكده تكون المقالة انتهت وتقدر تتواصل معانا علي الفيس بوك لو حابب تستفسر عن شئ أو تشوف المتجر الخاص بينا والمنتجات المعروضة عليه واتأكد أن كل المنتجات المعروضة بالذات الاستيراد بيتم اختبارها كويس جداً من فريق محترف جداً في المجال وكمان بيكون ليك ضمان والشحن بيكون لـ أي مكان في مصر مع الاتفاق مع شركة الشحن هيوصلك المنتج متغلف كويس جداً بدون أي كسر أو خدوش مهما كانت شركة الشحن لاننا بعتني بالمنتج كويس جداً وبنطلعه في أفضل وأحسن صورة وكل ده علشان أحنا بنعمل علي رضاكم و احنا موجودين في اي وقت للرد علي استفسارتكم.
أرجو أن نكون قد وفقنا بهذا العمل و اتمنى ان تكونوا قد استفدتم منه.
مع تحيات فريق عمل تريند بى سى | Trend PC
يمكنك التعرف ايضاً علي الفرق بين الكيبورد العادي والميكانيكى
تابعونا علي فيس بوك Trend PC
